महिला रुग्णांसह विद्यार्थ्यांचा जिवघेणा प्रवास, शिक्षक प्रशांत लोखंडे यांच्याकडून प्रशासनाला आठ दिवसांची मुदत…
———————–
प्रतिनिधी :
———————–
वसमत येथे गणेशपुर रोडवर शासकीय स्त्री रुग्णालय आहे. तसेच याच रोडवरुन ग्रामीण भागातील विद्यार्थी वसमत येथे ये-करतात. मात्र सदरील रस्त्यांची अक्षरशः चाळणी झाली असून जागोजागी मोठे खड्डे पडल्याने दयनीय अवस्था झाली आहे. परिणामी शासकीय स्त्री रुग्णालयात महिलांना उपचारासाठी जाणे कठीण होऊन बसले आहे. त्यासाठी थोरावा येथील शिक्षक प्रशांत लोखंडे यांनी तालुका प्रशासनास निवेदन देऊन सदरील वसमत थोरावा रस्त्याची आठ दिवसात दुरुस्ती न झाल्यास आपण १८ सप्टेंबर रोजी खड्यात बसून पुस्तक वाचो आंदोलन करणार असल्याचा इशारा दिला आहे.
आंदोलक शिक्षक प्रशांत लोखंडे यांनी यापुर्वीही सप्टेंबर महिन्याच्या सुरुवातीला रेल्वे पुलावरील खड्डे बुजवून त्वरीत रस्ता दुरुस्त करावा यासाठी भीक मांगो आंदोलन करीत प्रशासनाचे लक्ष वेधले होते. त्यानंतर आता गणेशपुर रोडवर असलेल्या स्त्री रुग्णालयाकडे जाणारया रस्त्यांची दुरावस्था झाली आहे. विशेष म्हणजे शासकीय सुसज्ज स्त्री रुग्णालय असल्याने उपचारांसाठी येणाऱ्या महिलांची संख्या जास्त असते. मात्र जागोजागी मोठे खड्डे व त्यात पावसाचे पाणी साचत असल्याने नागरीकांना खड्ड्यांचा अंदाज येत नाही. परिणामी धोकादायक कसरत महिला रुग्णांच्या नसीबी आली आहे. तसेच हिच अवस्था विद्यार्थ्यांची सुध्दा होत आहे. खड्ड्यातून जीव मुठीत धरून प्रवास करण्याची वेळ त्यांच्यावर आली आहे. रस्त्याची दुर्दशा पाहून महिला रुग्ण रुग्णालयाकडे पाठ फिरवत असल्याचे धक्कादायक चित्र असल्याचे प्रशांत लोखंडे यांनी निवेदनात नमूद केले आहे.
प्रशासनाने याबाबत तात्काळ कारवाई करीत आठ दिवसांच्या आत रस्ता दुरुस्त करुन महिला रुग्णांचे, विद्यार्थ्यांचे व प्रवासी नागरीकांचे हाल थांबवावे. रस्ता दुरुस्त न झाल्यास १८ सप्टेंबर २०२५ रोजी रस्त्यावरील खड्यात बसून पुस्तक वाचो आंदोलन करण्यात येईल असा इशाराही निवेदनात प्रशांत लोखंडे यांनी दिला आहे.
